क्यानले क्रिकेटरको तलबका लागि आईसीसीलाई पत्र पठाइयो



क्यानले क्रिकेटरको तलबका लागि आईसीसीलाई पत्र पठाइयो

नेपाल क्रिकेट संघ (क्यान)ले क्रिकेट खेलाडीको तलब निकासाका लागि अन्तर्राष्ट्रिय क्रिकेट काउन्सिल (आईसीसी)मा २३ जनाको नाम पठाएको छ ।

आईसीसीले तलब पठाउनका लागि खेलाडीको हस्ताक्षरसहित डकुमेन्ट पठाउन भनेपछि क्यानले २३ जनाको नाम पठाएको हो । क्यान निलम्बनमा रहँदा क्रिकेट खेलाडीको तलब आईसीसीले नै दिँदै आएको थियो । त्यसै अनुसार २०१९ को तलबको लागि नामावली संकलन गरेर आईसीसीमा पठाइएको क्यान सचिव अशोकनाथ प्याकुरेलले अनलाइनखबरलाई बताए ।

‘आईसीसीले २०१९ को तलब बाँड्नुपर्ने हो । यो पुरानो नै हो । त्यसको प्रकियाको लागि खेलाडीले कन्ट्रयाक्ट गर्नुपर्ने थियो । त्यो कन्ट्रयाक्ट गरेर सबै उता पठाउनुपर्ने माग भएको थियो । त्यसैको लागि हामीले पठाएका हौं,’ प्याकुरेलले भने ।

पछिल्लो पटक आईसीसीले सन् २०१८ मा दुई वर्षको एकमुष्ट तलब राष्ट्रिय खेलकुद परिषदमार्फत खेलाडीलाई पठाएको थियो । त्यसपछि अहिलेसम्म खेलाडीको तलब आएको छैन ।

२०१८ मा विभिन्न ३ श्रेणीमा रहेका २१ खेलाडीको तलब आएको थियो । क्यानका सचिव प्याकुरेलका अनुसार २०१९ मा आईसीसीले नै २२ जनाको तलब पठाउन लागेको बताए ।

‘२०१९ को लागि तलबका लागि २२ जना खेलाडी छन् । आईसीसीले नै २०१९ मा २२ जनाको सूची बनाएको छ,’ प्याकुरेलले भने,’ त्यसमा एक जना भिडियो एनालिस्टसहित २३ जना छन् ।’

प्याकुरेलले यो क्यानको निलम्बन फुकुवा हुनुअघिको सूची रहेको बताए । ‘२२ जनाको नाम उतैबाट आएको हो । यो हामी फुकूवा हुनुअघिको हो । हामीले पठाउनुपर्ने नामहरु पठाएका छौँ । हाम्रो काम यसलाई सहजीकरण गर्ने मात्र हो,’ उनले भने ।

पछिल्लो ग्रेडिङ सम्झौताअनुसार ग्रेड ‘ए’मा रहेका खेलाडीले ३५ हजार, ग्रेड ‘बी’ मा रहेका खेलाडीले २५ हजार र ग्रेड ‘सी’ मा रहेका खेलाडीले १५ हजार पाउनेछन् ।

ग्रेडिङमा रहेका २१ खेलाडीसहित एमसीसीविरुद्ध टीयू मैदानमा फस्ट क्लास क्रिकेट खेलेका राजु रिजालको नामसमेत थपेर आईसीसीमा पठाइएको स्रोतले जनाएको छ ।

यस्तै क्यान निलम्बनमा रहँदा नेपाली टिमको व्यवस्थापन पनि सम्हाल्दै आएका भिडियो एनालिस्ट रमन शिवाकोटीको नाम पनि पठाइएको छ ।

सचिव प्याकुरेलले यताबाट गर्नुपर्ने काम गरिसकेको र अब सकेसम्म चाँडै खेलाडीको तलब निकासा हुने बताए । ‘उहाँहरुले प्रोसेसिङमा छौँ भन्नुभाछ । उताको पनि काम लामै हुन्छ । उहाँहरुले केही हप्ता लाग्छ भन्नुभाछ । सम्भवत अर्को हप्तासम्म हुन्छ होला,’ प्याकुरेलले भने ।

विश्वभर महामारीको रुपमा फैलिएको कोरोना संक्रमणका कारण नेपाली खेलाडीले तलब पाउन पनि ढिलाइ भइरहेको छ । यसैगरी क्यानले महिला र पुरुष १८-१८ जना गरी ३६ खेलाडी र स्टाफहरुको कवरोना विमा गर्ने भएको छ ।

ग्रेडिङमा रहेका २१ खेलाडीहरु

ए श्रेणी : पारस खड्का, ज्ञानेन्द्र मल्ल, शरद भेषावकर, बसन्त रेग्मी, सोमपाल कामी, सन्दीप लामिछाने, दीपेन्द्रसिंह ऐरी ।

बी श्रेणी : शक्ति गौचन, आरिफ शेख, करण केसी, ललित भण्डारी, अनिलकुमार साह, रोहितकुमार पौडेल, ललितनारायण राजवंशी ।

सी श्रेणी  :  सुवास खकुरेल, सागर पुन, दिलिप नाथ, सुनील धमला, सुशन भारी, किशोर महतो, विनोद भण्डारी ।

तलबको लागि पठाइएका थप दुई नाम

राजु रिजाल (खेलाडी)

रमन शिवाकोटी (भिडियो एनालिस्ट)

अभियान पोष्ट

सम्बन्धित थप समाचार

Leave a Reply

Your email address will not be published. Required fields are marked *