प्रिमियर लिग राउन्ड अपः कीर्तिमान पछ्याउँदै लिभरपुल, सिटीको गोल वर्षा



प्रिमियर लिग राउन्ड अपः कीर्तिमान पछ्याउँदै लिभरपुल, सिटीको गोल वर्षा

प्रिमियर लिगमा कीर्तिमानी अंक बटुल्ने होडमा रहेको च्याम्पियन लिभरपुलले ब्राइटनलाई ३–१ गोल अन्तरले पराजित गरेको छ । खेलको सुरुवातमा नै ब्राइटनले दुई गोल खान पुगेको थियो । मोहमद शलाह र जोर्डन हेन्डरसनले दुई मिनेटको अन्तरमा लिभरपुलका लागि दुई गोल गरेका थिए ।

तर, पहिलो हाफको अन्त्यमा लियान्ड्रो ट्रोसार्डले गोल गर्दै निकै संघर्ष गरेको ब्राइटनलाई खेलमा फर्काउने प्रयास गरेका थिए । उनले तारिक लाम्पटेको क्रसमा एलिसनलाई बिट गरेका थिए ।

दोस्रो हाफमा सलाहले अर्को गोल थप्दै लिभरपुलको जीत सुनिश्चित गरे । यो सिजन लिगमा उनको १९ औँ गोल हो । जीतसँगै लिभरपुलको  ३४ खेलबाट ९२ अंक पुगेको छ ।

टोली म्यान्चेस्टर सिटीले लिगमा बनाएको १ सय अंकको कीर्तिमानबाट मात्र ८ अंकले टाढा रहेको छ । लिभरपुलले यो सिजन ३४ मध्ये ३० खेल जितेको छ । दुईमा हार तथा दुई खेलमा बराबरी गरेको छ । लिगको एक सिजनमा सबैभन्दा चाडो ३० खेल जित्ने पनि लिभरपुल पहिलो टोली बनेको छ ।

उता, सिटीले पनि न्युक्यासल युनाइटेडमाथि गोलको वर्षा नै गरेको छ । अघिल्लो खेलमा साउथह्याम्पटनसँग अप्रत्यासित पराजय बेहोरेको सिटीले यो खेलमा भने उत्कृष्ट प्रदर्शन गरेको थियो ।

ग्याब्रियल जिससले ९ खेलको गोलको खडेरी अन्त्य गर्दै सिटीलाई खेलको १० औँ मिनेटमा अग्रता दिलाए । रियाद महारेजले सिटीका लागि दोस्रो गोल थपे ।

दोस्रो हाफमा फेडेरियो फर्नान्डेजले आत्मघाती गोल गरे भने डेभिड सिल्भाले सिटीका लागि फ्रिकिकबाट चौथो गोल गरे । खेलको इन्जुरी समयमा राहिम स्टर्लिङले पाँचौ गोल थपे । खेल सिटीले ५–० ले जित्यो ।

अन्य खेलमा सेफल्ड युनाइटेडले वुल्भस र बर्नलीले वेस्ट ह्यामलाई समान १–० गोलअन्तरले हराएको छ ।

अभियान पोष्ट

सम्बन्धित थप समाचार

Leave a Reply

Your email address will not be published. Required fields are marked *