डब्लूएचओ प्रमुखले भने, ‘विभाजित विश्वले महामारीलाई जित्न सक्दैन’



डब्लूएचओ प्रमुखले भने, ‘विभाजित विश्वले महामारीलाई जित्न सक्दैन’

विश्व स्वास्थ्य संगठनका प्रमुखले कोरोनाभाइरसको महामारीसँग लड्नका लागि ‘नेतृत्वको अभाव’ को आलोचना गर्दै वैश्विक एकताका लागि भावुक अपिल गरेका छन् । विनाशकारी भाइरस पहिचान भएको छ महिनाभन्दा बढी भइरसक्दा पनि पूरा विश्व यसलाई नियन्त्रण गर्न संघर्षरत छ भने दैनिकरुपमा संक्रमितको संख्या बढ्दो छ ।

‘साथीहरु, गल्ती नगर्नुहोला । आज हाम्रो सामु भाइरसमात्र सबैभन्दा ठूलो चुनौती होइन,’ टेड्रोस अधानोम घेब्रेसियसले जेनेभामा आयोजित पत्रकार सम्मेलनमा भने, ‘हाम्रो लागि चुनौती भनेको राष्ट्रिय र वैश्विक स्तरमा नेतृत्व र ऐक्यबद्धताको कमी हो ।’

डब्लूएचओ प्रमुखको यो अभिव्यक्तिलाई अमेरिकी राष्ट्रपति डोनाल्ड ट्रम्पप्रति लक्षित रहेको धेरैको बुझाइ छ । आफ्नै देशमा विश्वकै खराब स्थितिमा रहेको कोरोनाभाइरसको महामारीलाई नियन्त्रण गर्न असफल रहेका ट्रम्पले डब्लूएचओविरुद्ध खुल्ला युद्ध सुरु गरेका छन् ।

‘यो त्रासदीले हामीलाई हाम्रा धेरै साथीहरुलाई गुमाउनु परिरहेको छ । विभाजित विश्वले यो महामारीलाई जित्न सक्दैन,’ भावुक बनेर बोली समेत लर्बरिएका टेड्रोसले भने ।

अमेरिकामा दैनिकरुपमा संक्रमितहरुको संख्यामा रेकर्ड वृद्धि भइरहेको छ । देशमा ३० लाखभन्दा बढी संक्रमित पुगिसकेका छन् । अन्य देशमा पनि उस्तै हालत रहेको देखिन्छ । ब्राजिलमा त राष्ट्रपति जायर बोल्सोनारो नै कोरोनाभाइरसबाट संक्रमित बनेका छन् । उनले कोरोनाभाइरसलाई सामान्य फ्लुको संज्ञा दिन्थे । भारतमा पनि एक दिनमा संक्रमितको संख्यामा रेकर्ड वृद्धि भएको छ भने मेक्सिकोमा भाइरसको संक्रमण बढ्दो छ ।

कोरोनाभाइरसलाई नियन्त्रण गर्न सफल भनेर वाहवाही कमाएको अस्ट्रेलियामा पनि मेलबर्नमा संक्रमण बढेपछि फेरि भिक्टोरियाका ६० लाख जनतालाई सिल गर्नुपरेको छ ।

‘कुनै भेदभाव बिना मानिसको ज्यान लिइरहेको एउटा साझा दुश्मनविरुद्ध एकताबद्ध भएर लड्न हामी मानिसहरुलाई किन गाह्रो भइरहेको छ ?,’ डब्लूएचओ प्रमुखले भने, ‘के हामीले हाम्रो साझा दुश्मनलाई चिन्न नसकेका हौँ ? हामीमा देखिने विभाजन भाइरसका लागि फाइदा हो भनेर किन बुझ्दैनौँ ?’

विश्वका शक्ति राष्ट्रहरुलाई एकताबद्ध हुन आह्वान गर्दै उनले भने, ‘कोभिड–१९ वैश्विक एकता र नेतृत्वको परीक्षा हो ।’

ट्रम्प प्रशासनले कंग्रेस र संयुक्त राष्ट्रसंघलाई अमेरिका डब्लूएचओबाट हट्ने औपचारिक प्रक्रिया सुरु गरेको जानकारी गराएको केही दिनपछि डब्लूएचओ प्रमुखको यस्तो धारणा आएको हो । ट्रम्पको यो कदमको आलोचना भइरहेको छ । डेमोक्रेटिक पार्टीबाट राष्ट्रपतिका सम्भावित उम्मेदवार जो बाइडनले त आफू राष्ट्रपतिमा निर्वाचित भए यो निर्णयलाई पहिलो दिनमा नै उल्ट्याउने वाचा गरेका छन् ।

चीन परस्त भएको भन्दै ट्रम्पले विश्व स्वास्थ्य संगठनको आलोचना गर्ने गरेका छन् । तर, जर्मनी, फ्रान्स र बेलायत जस्ता शक्ति राष्ट्रहरु संकटको घडीमा डब्लूएचओको पक्षमा देखिएका छन् ।

बिहीबार जर्मन चान्सलर एन्जेला मार्केलले महामारीले विश्वभर देखिएको ‘तथ्य नस्वीकार्ने पपुलिजम’ को खतरालाई उजागर गरेको बताएकी थिइन् । ‘हामीले झुट र दुष्प्रचार देख्यौँ, महामारीसँग लड्ने यो तरिका होइन ,’ ब्रसेल्समा युरोपियन संसदलाई उनले भनेकी थिइन् ।

स्रोतः सीएनएन

रुद्र कार्की

सम्बन्धित थप समाचार

Leave a Reply

Your email address will not be published. Required fields are marked *