सिन्धुली । सिन्धुलीमा दुईवटा ५ सय मिटर लामा पुलहरू सम्झौता अवधिभन्दा अगाडि नै निर्माण सम्पन्न भएका छन् ।
जिल्लाको दुधौली नगरपालिकामा रसुवा कन्स्ट्रक्सनले निर्माण गरेको ५ सय मिटर र ६ सय मिटरका दुईवटा पुल सम्झौता अवधिभन्दा सत्र महिनाअगावै निर्माण सम्पन्न भई सञ्चालनमा आएको हो ।
२७ मंसिर ०७४ मा निर्माण सम्झौता भई ०७८ जेठ र मंसिरमा सम्पन्न गर्ने जिम्मा कन्स्ट्रक्सनले पाएको इन्जिनियर डिल्लीप्रसाद ढकालले बताए । उनका अनुसार दुधौली नगरपालिकाको टाँडीमा निर्माण भएको ६ सय मिटर लामो पुल ०७८ मंसिर २७ गतेसम्ममा निर्माण गरिसक्नुपर्ने र डकाहामा निर्माण भएको ५ सय मिटर लामो पुल ०७८ जेठ २७ गतेसम्ममा निर्माण सम्पन्न गर्नुपर्नेमा ०७७ जेठ तेस्रो हप्ताभित्रै निर्माण सम्पन्न भई सञ्चालनमा आइसकेका छन् ।
जेठ अन्तिमबाट साना तथा मझौला सवारीसाधन सञ्चालन गर्न दिएको भए पनि असार १५ बाट भने ठूला सवारीसाधन सञ्चालनमा आएको ढकालले बताए ।
मदन भण्डारी राजमार्गमा पर्ने पुलहरूमध्ये ४३ वटा पुल रसुवा कन्स्ट्रक्सनले पाएकामा सबै पुलहरूको निर्माण कार्य सम्पन्न भइसकेको इन्जिनियर ढकालले बताए । राजमार्गमा निर्माण भएका पुलहरूको निर्माण कार्य सम्पन्न भए पनि पुलको वारिपारिको भाग पिच गर्न बाँकी छ ।
कन्स्ट्रक्सनले जिम्मा पाएका पुलहरू अहिलेसम्म कुनै पनि सम्झौता अवधिभन्दा पछाडि नधकेलिएको उनले बताए । ‘मदन भण्डारी राजमार्गमा पर्ने र यस कन्स्ट्रक्सनले निर्माणको जिम्मा पाएका पुलहरूको निर्माण सकिएको छ, अधिकांश पुलहरूबाट अहिले सवारीसाधनसमेत सञ्चालन भइरहेको छ,’ ढकालले भने ।
