काठमाडाै । लकडाउनका कारण काठमाण्डौं उपत्यकामा अलपत्र परेका प्रदेश नं. ५ का झण्डै ४ सयजना नागरिकलाई घर पठाईएको छ । भक्तपुर र ललितपुरमा रहेका उनीहरुलाई आज ८ वटा बसमा प्रदेश-५ मा पठाईएको हो ।
आज पठाईएका धेरैजसो भक्तपुर र ललितपुरका विभिन्न इट्टा उद्योगमा काम गर्ने रोल्पा, रुकुम, सल्यान, दाङ र प्यूठानका श्रमिक छन् ।
ऊर्जा, जलस्रोत तथा सिँचाइमन्त्री वर्षमान पुन को पहलमा काठमाण्डौंमा अलपत्र परेका प्रदेश नं.५ का नागरिकको उद्धार गरेर घर पठाईएको हो ।
ऊर्जामन्त्री पुनले आज साँझ भक्तपुर पुगेर अलपत्र परेका नागरिकहरुलाई ६ वटा बसमा विदाई गरे । दिउँसो दुईवटा बसमा पठाईएको थियो ।
रोल्पाबाट प्रतिनिधिसभामा निर्वाचित ऊर्जामन्त्री पुनलाई सरकारले कोरोना भाइरस रोकथाम तथा नियन्त्रण सम्बन्धी कामका लागि प्रदेश नं. ५ को समन्वय गर्ने जिम्मेवारी दिएको छ ।
मन्त्री पुनले लकडाउनको समयमा सकेसम्म बसिरहेकै ठाउँमा बस्नुपर्ने र असाध्यै अप्ठ्यारा परेकाहरुलाई घर पठाउने सरकारको नीति रहेको जानकारी दिएका छन् ।
